Tetesi Za Usajili Simba Leo 2025/2026

Tetesi Za Usajili Simba Leo 2025/2026: Nani Anaingia? Nani Anatoka Msimbazi?

Wakati pazia la msimu wa 2024/2025 likikaribia kufungwa, macho ya vilabu vikubwa barani Afrika tayari yameelekezwa kwenye dirisha la usajili, likiwa ni wakati wa kusaka vipaji vipya kwa ajili ya msimu ujao.

Klabu ya Simba SC, maarufu kama Wekundu wa Msimbazi, inabaki kuwa miongoni mwa timu zilizoonesha dhamira kubwa ya mabadiliko msimu huu, baada ya kufanya usajili mkubwa ulioiwezesha kutinga hatua ya nusu fainali ya Kombe la Shirikisho CAF 2024/25, pamoja na kushika nafasi ya pili kwenye msimamo wa Ligi Kuu NBC, tofauti ya pointi moja tu nyuma ya watani zao wa jadi, Yanga SC.

Huku msimu huu ukiwa umesalia na mechi chache kabla ya kufikia tamati, tayari tetesi za usajili zimeanza kusikika rasmi kwa Wekundu wa Msimbazi. Mabosi wa Simba wameshaanza mipango ya ndani kwa ndani ili kuhakikisha wanajenga kikosi imara kitakachotwaa taji la Ligi Kuu na kufanya vizuri zaidi kimataifa msimu ujao. Katika makala hii, tutaangazia kwa kina majina ya wachezaji wanaotajwa kuwa kwenye rada za mabadiliko ndani ya Simba, wale wanaomaliza mikataba na wanaotajwa kutemwa, pamoja na hatua zinazochukuliwa na klabu kuimarisha kikosi chao kuelekea msimu wa 2025/2026.

Kikao cha Bodi ya Wakurugenzi na Ripoti ya Kocha Fadlu Davids

Katikati ya wiki, mabosi wa Simba walikutana katika kikao cha Bodi ya Wakurugenzi kilichoongozwa na Mwenyekiti Mohammed ‘MO’ Dewji, sambamba na viongozi wa zamani.

Kikao hicho kilijadili mambo mbalimbali, ikiwemo kupitia ripoti ya kocha Fadlu Davids kwa ajili ya kusuka kikosi cha msimu ujao. Pamoja na tathmini ya msimu uliomalizika, waliafikiana na pendekezo la kocha la kuanza na usajili wa “mashine” sita.

Taarifa kutoka ndani ya klabu zimedokeza kuwa uongozi wa Simba umekubali kusaini mikataba mipya ya mwaka mmoja na benchi la ufundi, likiongozwa na Kocha Fadlu Davids, ikiwa na kipengele cha kuongezwa mwingine.

Hatua hii inahitimisha sintofahamu iliyokuwapo juu ya hatma ya benchi la ufundi baada ya kushindwa kufikia mafanikio yaliyotarajiwa msimu uliopita, ambapo lengo kubwa lilikuwa kufanya vizuri zaidi kwenye mashindano ya kimataifa.

Mahitaji ya Kocha Fadlu Davids: “Mashine” Sita Mpya

Kwa mujibu wa chanzo cha ndani, Kocha Fadlu Davids amependekeza kuongezewa nguvu kwa baadhi ya maeneo muhimu katika kikosi cha sasa kwa kuletewa wachezaji wapya wasiopungua sita. Maeneo hayo ni pamoja na:

• Mshambuliaji: Kuongeza nguvu kwa eneo analocheza Jean Charles Ahoua, aliyemaliza kinara wa mabao wa ligi akifunga 16 na kutoa asisti tisa. Ripoti ya awali ya Fadlu ilihitaji Ahoua aongezewe nguvu zaidi.
• Beki wa Kati: Anahitaji beki wa kati mwenye uwezo wa kukaba kwa akili na nguvu.
• Kiungo Mkabaji: Anataka kiungo mkabaji mwenye ubora kama au kushinda Yusuf Kagoma.
• Kiungo Mshambuliaji (Namba 10): Mwenye ubora kushinda Ahoua.
• Winga wa Kulia: Mwenye makali kushinda Joshua Mutale.
• Mshambuliaji wa Kati: Mwenye ujuzi wa kufunga kushinda Steven Mukwala na Leonel Ateba. Sababu kubwa ya kutaka mshambuliaji mwingine ni kutokana na taarifa kwamba huenda Mukwala anaweza kuondoka baada ya kupata ofa yenye maana inayoweza kuipa timu hiyo fedha nzuri kutoka klabu moja ya Afrika Kaskazini ambayo hata hivyo haijafahamika.

Hata hivyo, chanzo hicho hakijataja wachezaji waliopendekezwa moja kwa moja, lakini taarifa zinaonyesha kuwa mabosi wa klabu hiyo wameanza kazi ya kusaka beki mpya wa kati atakayetoka kati ya vikosi vya majeshi, kama ilivyo kwa kipa atakayechukua nafasi iliyoachwa na Aishi Manula aliyerudi Azam FC.

Wachezaji Wenye Mikataba Inayotajwa Kukalibia Mwisho Simba SC

1. Aishi Manula: Mlinda Lango Wa Zamani Anatazamiwa Kuagana na Msimbazi

Baada ya kupoteza namba kwa msimu wa pili mfululizo, kipa wa zamani wa kikosi cha kwanza cha Simba na Taifa Stars, Aishi Manula, anaelezwa kuwa kwenye hatua za mwisho za kuondoka Msimbazi. Ujio wa Ayoub Lakred na baadaye Mousa Camara, ambaye kwa sasa ndiye chaguo la kwanza, umeathiri nafasi ya Manula kiasi cha kutopata hata namba ya benchi. Kwa mujibu wa vyanzo vya ndani ya klabu, Simba hawapo tayari kuongeza mkataba wake unaotarajiwa kumalizika mwisho wa msimu huu.

2. Shomari Kapombe: Mkataba Mwisho, Bado Haijulikani Ataendelea au La

Beki wa kulia Shomari Kapombe, ambaye ni tegemeo kwa muda mrefu ndani ya Simba na Taifa Stars, naye mkataba wake unaelekea ukingoni. Huu ni msimu wa pili mfululizo Kapombe akiongezewa mkataba dakika za mwisho, jambo linaloonyesha sintofahamu kuhusu mustakabali wake. Beki huyo tayari ameonyesha mchango mkubwa kwa kutwaa mataji manne ya Ligi Kuu na kuifikisha Simba robo fainali za CAF mara sita. Mabosi wa Simba wanatarajiwa kumwita mezani kwa mazungumzo mapya, lakini bado haijathibitishwa kama watakubaliana.

3. Mohammed Hussein ‘Tshabalala’: Nahodha Wa Kikosi Hatua Moja Nje ya Mlango?

Beki wa kushoto wa muda mrefu, Tshabalala, ambaye kwa sasa ni nahodha wa timu, yupo kwenye hali ya kusubiri. Licha ya mchango wake mkubwa kwa zaidi ya misimu 10, Simba wanadaiwa kuchelewa kumwongezea mkataba mpya.

Hii ni kwa sababu tayari ameanza kuvuta macho ya vilabu vingine vya ndani na nje ya nchi. Ingawa uongozi wa klabu umeonesha nia ya kuendelea naye, hatima yake bado haijafahamika kikamilifu.

4. Fabrice Ngoma: Kiungo Fundi Akaribia Mwisho wa Safari

Kiungo wa ukabaji kutoka DR Congo, Fabrice Ngoma, ambaye alijiunga na Simba msimu uliopita akichukua nafasi ya Sadio Kanoute, naye mkataba wake unamalizika. Ameonesha kiwango bora katika eneo la kiungo, akiwa amefunga mabao mawili msimu huu.

Ingawa bado hajathibitisha kubaki, klabu yoyote yenye fedha inaweza kumsajili kwa urahisi, huku Simba wakihitaji kuvunja benki kama wanamtaka aendelee kubaki.

Wachezaji Wanaohusishwa na Maongezi ya Mikataba Mpya

1. Ismaila Kante – Kiungo Fundi Kutoka CA Bizertin

Simba SC iko mbioni kukamilisha usajili wa kiungo mahiri wa kimataifa kutoka Senegal, Ismaila Kante, ambaye amekuwa sehemu muhimu ya kikosi cha CA Bizertin kwa zaidi ya misimu mitatu. Kante alijiunga na klabu hiyo ya Tunisia Oktoba 2022 na amekuwa mchezaji tegemeo akicheza mara kwa mara katika kikosi cha kwanza.

Kwa mujibu wa taarifa kutoka ndani ya Simba, klabu hiyo tayari imekubali kulipa kiasi cha Dola 285,000 (takribani Shilingi milioni 742) kumalizia mwaka mmoja wa mkataba wake uliobaki na CA Bizertin. Hii ni ishara ya dhamira ya Simba ya kuimarisha eneo la kiungo cha kati, hasa baada ya kuondoka kwa wachezaji kama Fabrice Ngoma, Debora Mavambo, na Augustine Okejepha.

Taarifa hizo zinaeleza:

“Kante anatarajiwa kutua Bongo muda wowote kuanzia sasa ili kukamilisha masuala ya usajili, pia muda wa kwenda pre-season umekaribia, hivyo wachezaji wanaanza kuripoti… Wakati wowote mkataba rasmi utasainiwa kwani makubaliano kamili kati ya pande zote yameshafanyika.”

Kante anatarajiwa kuungana na Yusuf Kagoma na kuleta ushindani mpya katika eneo la kiungo mkabaji, huku akiwa mrithi sahihi wa mastaa waliotemwa au waliomaliza mikataba. Pia, hatma ya Mzamiru Yassin, ambaye mkataba wake umefikia ukingoni, bado haijafahamika.

2. Rodrigue Kossi – Kiungo wa Kimataifa Kutoka Benin

Simba pia imeelekeza macho yake kwa kiungo mzawa wa Benin, Rodrigue Kossi Fiogbé (25), ambaye amemaliza mkataba wake na ES Sétif ya Algeria mwishoni mwa msimu wa 2024/2025. Kossi anatajwa kuwa mmoja wa wachezaji wanaofuatiliwa kwa ukaribu na Kocha Fadlu Davids ambaye kwa sasa anaongoza maamuzi ya usajili wa wachezaji wa kimataifa.

Kwa mujibu wa taarifa:

“Kocha Fadlu anataka kwenye eneo la katikati awe na viungo watatu, ndiyo maana anapambana kuwapata wawili wa kigeni na mmoja mzawa. Simba ina urahisi zaidi kwenye dili la Rodrigue kwa sababu ni mchezaji huru tangu Julai Mosi mwaka huu.”

Kossi anapewa nafasi kubwa ya kujiunga kutokana na hali yake ya kuwa huru sokoni, jambo linaloifanya Simba kutokuwa na kikwazo cha kifedha katika kukamilisha dili hilo.

3. Charve Onoya – Msaidizi wa Jean Charles Ahoua

Katika harakati za kuimarisha safu ya kiungo mshambuliaji, Simba iko kwenye mazungumzo na kiungo wa kimataifa kutoka DR Congo, Charve Onoya Sangana (21), anayekipiga katika klabu ya Union Maniema. Kocha Fadlu ameripotiwa kueleza kuwa mshambuliaji wa msimu uliopita, Jean Charles Ahoua, anahitaji msaidizi wa kiwango cha juu iwapo atabaki au hata kama atakosekana.

Kwa mujibu wa chanzo kutoka ndani ya Simba:

“Simba ipo kwenye mazungumzo ili kumpata kiungo huyo ambaye atakuwa anacheza kwa kusaidiana na Ahoua kama ripoti ya kocha ilivyohitaji.”

Harakati hizi zimechochewa na ukweli kwamba Ahoua alibeba mzigo mkubwa msimu uliopita, akifunga mabao 16 katika mashindano ya ndani. Onoya anatambulika kama kiungo mwenye kasi, uwezo wa kupenya safu za ulinzi, na mshambuliaji wa pili mzuri, jambo linalomvutia benchi la ufundi la Msimbazi.

Simba inafanya juhudi kubwa kuimarisha kikosi chao kabla ya msimu mpya. Licha ya uwezekano wa kuondoka kwa baadhi ya nyota, kuna taarifa kuwa uongozi uko mbioni kuanza mazungumzo mapya na baadhi ya mastaa wake waliobaki, wakiwemo:

• Sadio Kanoute (licha ya kuondoka awali, kuna tetesi za Simba kumrejesha)
• Clatous Chama, ambaye amekuwa kivutio licha ya kushindwa kupata nafasi ya kudumu Yanga baada ya kuondoka Msimbazi, sasa anahusishwa na kurejea Simba kwa msimu ujao.
• Wachezaji chipukizi, kama Yusuf Kagoma na Pape Sakho, wanatajwa pia kupewa nafasi zaidi msimu ujao kutokana na ubora waliouonesha hivi karibuni.

Pia, Simba SC inaripotiwa kufanya mazungumzo na wachezaji kadhaa wapya:

• Abdallah Klandana: Beki kutoka Fountain Gate.
• Karim: Beki wa pembeni kutoka JKT Tanzania anawindwa na Simba.
• Yakubu Suleiman: Kipa anatajwa kuwa moja ya shabaha kubwa kwa nafasi ya golikipa, hasa baada ya kuondoka kwa Manula.
• Iginho Epalanga Capitango: Kiungo mkabaji kutoka Angola, anasemekana kuwa karibu kujiunga na Simba. Anajulikana kwa mashuti yake makali.

Maeneo Yatakayofanyiwa Maboresho

Kwa mujibu wa vyanzo vya karibu na uongozi wa Simba, timu inatarajia kufanyia kazi maeneo yafuatayo kwenye dirisha la usajili:

1. Mlinda mlango mpya mwenye kiwango cha kimataifa ili kuimarisha ushindani kati ya Camara na mchezaji mpya atakayesajiliwa.
2. Beki wa kati wa kigeni mwenye uzoefu wa CAF kwa ajili ya kuongeza ukuta thabiti.
3. Kiungo mkabaji atakayesaidiana na Ngoma au kumrithi endapo ataondoka.
4. Mshambuliaji wa kati, baada ya kutokuwepo kwa mshambuliaji wa kiwango cha juu ambaye angeweza kufunga magoli ya ushindi katika mechi kubwa.

Mapendekezo ya Mhariri:

1. Ratiba ya Kombe la Dunia la Vilabu 2025
2. Al Ahly Yatoka Sare na Inter Miami ya Messi Kombe la Dunia la Vilabu FIFA 2025
3. Liverpool Yakamilisha Dili la Pauni Milioni 116 Kumsajili Florian Wirtz
4. Ofisa Mtendaji Mkuu wa TPLB Almasi Kasongo Asimamishwa Kazi na TFF
5. Steven Mguto Ajiuzulu Uenyekiti wa Bodi ya Ligi Kuu Tanzania (TPLB)
6. Msimamo wa Makundi ya Kombe la Dunia la Vilabu 2025
7. Franco Mastantuono Ajiunga Rasmi na Real Madrid | Habari Kamili
8. Benchi la Ufundi Kengold Njiapanda, Maandalizi Dhidi ya Simba Yakosa Mwelekeo