Mashujaa FC Yaanza Harakati za Kumsajili Beki wa Simba SC

Mashujaa FC Yaanza Harakati za Kumsajili Beki wa Simba SC

Klabu ya Mashujaa imeanza rasmi mchakato wa kukipa nguvu kikosi chake kuelekea msimu ujao wa 2025/2026, ambapo uongozi wa maafande hao umeonesha nia ya kutaka kumsajili beki wa kati wa Wekundu wa Msimbazi, Simba SC.

Harakati hizi ni sehemu ya mikakati ya mapema ya klabu hiyo katika kuhakikisha inakuwa na kikosi imara kitakachoshindana vyema kwenye Ligi Kuu Tanzania Bara msimu unaokuja.

Kwa mujibu wa taarifa zilizopo, Mashujaa FC inalenga kumsajili Hussein Kazi, beki wa kati anayeichezea Simba SC ambaye yuko mwishoni mwa mkataba wake. Kazi alijiunga na Simba mnamo Julai 20, 2023 akitokea Geita Gold, lakini amekuwa na wakati mgumu kupata nafasi ya kudumu katika kikosi cha kwanza, jambo ambalo limemfanya kutazama uwezekano wa kutafuta changamoto mpya.

Ripoti zinaeleza kuwa nia ya kumleta Hussein Kazi imetokana na mapendekezo ya Kocha Mkuu wa Mashujaa FC, Salum Mayanga, ambaye anataka kuimarisha safu ya ulinzi ya timu hiyo. Eneo hilo limekuwa na changamoto, hasa baada ya beki wake muhimu Ibrahim Ame kukumbwa na majeraha ya mara kwa mara ya misuli.

Kwa muktadha huo, benchi la ufundi liliwasilisha ombi kwa uongozi wa timu hiyo kuanza mapema mchakato wa usajili wa wachezaji wapya, na jina la Hussein Kazi likajitokeza kama miongoni mwa waliolengwa kuongeza nguvu katika idara ya ulinzi.

Akizungumza na vyombo vya habari, Mwenyekiti wa Mashujaa FC, Meja Abdul Tika, alithibitisha kuwa tayari kuna mapendekezo ya maboresho kutoka kwa benchi la ufundi, na kwamba uongozi umeanza kuyafanyia kazi mapema.

Hata hivyo, Meja Tika alieleza kuwa bado ni mapema kuweka wazi majina ya wachezaji wanaolengwa kwa sababu za kiushindani, hasa wakati huu ambapo timu inakamilisha mechi zake za mwisho wa msimu.

“Kuna mapendekezo ya benchi la ufundi yaliyowasilishwa, na sisi pia kama viongozi tumeanza kufanyia kazi mapema. Hatuwezi kuweka wazi ni wachezaji gani ambao tunawahitaji kwa sasa kwa sababu za kiushindani zilizopo,” alisema Meja Abdul Tika.

Mustakabali wa Hussein Kazi Simba SC

Licha ya kuwa na uzoefu wa kucheza katika vilabu kadhaa kama Forester ya Shelisheli, Mbeya Kwanza, Polisi Tanzania, na Geita Gold, Hussein Kazi hajapata nafasi ya kudumu ndani ya kikosi cha kwanza cha Simba SC. Safu ya ulinzi ya Simba inayoongozwa na wachezaji kama Che Malone Fondoh, Abdulrazack Hamza, na Chamou Karaboue, imekuwa na ushindani mkubwa.

Kwa sasa, hakuna dalili zozote za kuongezwa kwa mkataba wake mpya ndani ya Simba SC, hali inayoashiria uwezekano mkubwa wa kuondoka mara baada ya msimu huu kumalizika.

Mapendekezo ya Mhariri:

1. Mamelodi Yaanza Kwa Ushindi wa 1-0 Dhidi ya Ulsan HD Kombe la Dunia
2. Ratiba ya Ligi Kuu England 2025/2026 EPL
3. Man United Kufungua Msimu Mpya wa EPL 2025/2026 Dhidi ya Arsenal
4. Wydad Yaanza Kombe la Dunia Kwa Kipigo Mikononi mwa Manchester City
5. Shirikisho la Soka Zanzibar Laitwanga KVZ Faini ya Milioni 3 Kisa Vurugu
6. Simba na Yanga Bado Zashikana Mashati Vita ya Ubingwa Ligi Kuu NBC 2025
7. Tetesi Za Usajili Simba Leo 2025/2026