Ibenge Atua Tanzania Kujiunga Rasmi na Azam FC kwa Msimu wa 2025/26
Mezani kwa mabosi wa Yanga kwa sasa kuna majina mawili ya makocha wanaopigiwa hesabu, mmoja kati yao akitarajiwa kuja kuziba nafasi iliyoachwa na Miloud Hamdi aliyekamilisha mkataba wake na kuelekea Ismailia ya Misri.
Katika kipindi ambacho uongozi wa Yanga unahaha kumleta kocha mpya, klabu ya Azam FC tayari imepiga hatua kubwa mbele kwa kufanya maamuzi ya mapema kwa kumleta kocha Florent Ibenge ambaye ameripotiwa kuwa nchini tangu Alhamisi iliyopita kwa ajili ya kuanza rasmi majukumu yake kwa msimu wa 2025/26 wa Ligi Kuu Tanzania Bara.
Kwa mujibu wa taarifa zilizopo, kocha Florent Ibenge ambaye amewahi kuvinoa vilabu vya AS Vita ya DR Congo na RS Berkane ya Morocco, ametua rasmi nchini Tanzania kwa ajili ya kujiunga na klabu ya Azam FC. Ujio wake unatajwa kuwa ni sehemu ya maandalizi mapema ya klabu hiyo kuelekea msimu mpya wa Ligi Kuu Tanzania Bara 2025/26 na kushiriki kwa ufanisi katika mashindano ya kimataifa.
Ibenge, ambaye pia ana uzoefu mkubwa katika soka la Afrika na mashindano ya CAF, amekutana na viongozi wa juu wa Azam FC kwa mazungumzo ya kina ambayo yanalenga kuweka mikakati ya muda mrefu ya mafanikio ya klabu hiyo. Hatua hii inaonyesha dhamira ya Azam FC kurejea kwenye ushindani mkali dhidi ya klabu vigogo kama Yanga SC na Simba SC.
Azam FC Yapiga Hatua Mapema Katika Maandalizi ya Msimu Mpya
Tofauti na wapinzani wao wakuu ambao bado wapo kwenye mchakato wa kumchagua kocha mkuu mpya, Azam FC tayari imeanza harakati za ndani kwa ndani kuhakikisha maandalizi ya msimu mpya yanakwenda kwa wakati. Uamuzi wa kuwaleta mapema benchi jipya la ufundi ukiwemo ujio wa Ibenge, unatazamwa kama mkakati wa kuleta mabadiliko ya kiufundi ndani ya kikosi hicho.
Kocha Ibenge anatarajiwa kuanza kazi mara moja kwa kushiriki katika upangaji wa mikakati ya usajili wa wachezaji wapya, kuandaa programu za mazoezi ya awali (pre-season), na kusimamia maandalizi ya mashindano ya CAF ambayo Azam FC inatarajiwa kushiriki.
Yanga Bado Watafakari, Azam Yaanza Kazi
Wakati ambapo Yanga SC bado inaendelea kutathmini kati ya makocha wawili waliopo mezani Mfaransa Julien Chevalier wa ASEC Mimosas na Msauzi Rhulani Mokwena Azam FC imefanikiwa kufikia hatua ya utekelezaji. Chevalier anatajwa kuwa na nafasi kubwa ya kutua Yanga huku akiahidi kuleta mshambuliaji hatari Celestin Ecua iwapo atapewa nafasi ya kuwa kocha mkuu.
Kwa upande wa Yanga, mchakato bado uko hatua ya mwisho, huku viongozi wakitaka kuharakisha mchakato huo ili kuanza maandalizi ya msimu mpya na kushiriki kikamilifu katika usajili wa wachezaji. Licha ya hatua nzuri ya mazungumzo kati ya Yanga na Chevalier, bado hakuna uthibitisho rasmi kama mkataba umefungwa.
Mapendekezo ya Mhariri:
