Kikosi cha Yanga Vs Silver Strikers Leo 25/10/2025
Leo, Timu ya Wananchi Yanga SC itakuwa kwenye dimba la Benjamin Mkapa jijini Dar es Salaam ikiwakaribisha Silver Strikers kutoka Malawi, katika mchezo wa marudiano wa Ligi ya Mabingwa Afrika (CAF Champions League). Mchezo huu unatarajiwa kuanza saa 11:00 jioni na utarushwa mubashara kupitia Azam Sports 3HD. Yanga wanaingia katika mchezo huu wakiwa na malengo makubwa ya kusaka ushindi wa zaidi ya goli moja ili kutinga hatua ya makundi ya michuano hiyo mikubwa ya bara la Afrika.
Katika mchezo wa kwanza uliochezwa Oktoba 18, 2025, nchini Malawi, Yanga SC walifungwa bao 1-0 na Silver Strikers, matokeo yaliyosababisha mabadiliko ndani ya benchi la ufundi la timu hiyo. Baada ya kipigo hicho, uongozi wa Yanga ulisitisha mkataba wa aliyekuwa Kocha Mkuu, Romain Folz, na kumkabidhi majukumu Patrick Mabedi, aliyekuwa msaidizi wake.
Mabedi, ambaye ni raia wa Malawi, sasa anaongoza kikosi hicho katika mchezo wa leo akibeba jukumu kubwa la kuhakikisha timu inafuzu hatua ya makundi. Yanga inahitaji ushindi wa angalau mabao 2-0 ili kufuzu moja kwa moja, lakini ikishinda 1-0, mchezo utaamuliwa kwa mikwaju ya penalti. Mabedi amesisitiza nidhamu ya ulinzi na mashambulizi ya kasi kama sehemu ya mkakati wake, akieleza kuwa hawataki kuruhusu bao lolote nyumbani. Amesema:
“Tumejifunza kutokana na makosa ya mechi ya kwanza. Tunatakiwa kuwa na nidhamu ya juu na kutumia kila nafasi kufunga. Tukiwa mbele ya mashabiki wetu, tunapaswa kuonyesha ubora wa Yanga.”
Nahodha msaidizi wa Yanga, Dickson Job, amesema kikosi kiko tayari kupambana kwa nguvu zote kurejesha heshima ya klabu na taifa. Amesisitiza kuwa wachezaji wamejipanga kuhakikisha wanapata ushindi muhimu.
“Tunajua umuhimu wa mechi hii. Tutapambana kwa jasho na damu ili kuingia hatua ya makundi. Mashabiki wajitokeze kwa wingi kutusapoti, umoja wetu utatupa matokeo mazuri,” amesema Job.
Ameongeza kuwa kufungwa ugenini hakumaanishi kushindwa, bali ni fursa ya kujifunza na kurekebisha makosa. Amewahakikishia mashabiki kuwa timu itacheza kwa kujituma zaidi na kwamba “Brand ya Yanga lazima iheshimike.”
Kikosi cha Yanga Vs Silver Strikers Leo 25/10/2025
Mashabiki wengi wanatazamia kwa hamu kuona orodha ya wachezaji ambao Kocha Patrick Mabedi atawapanga katika mchezo wa leo. Kwa kawaida, katika michezo ya kimataifa ya CAF, kikosi cha kwanza hutangazwa rasmi saa moja kabla ya mchezo kuanza.
Hivyo basi, kikosi rasmi cha Yanga SC dhidi ya Silver Strikers Leo 25/10/2025 kitapangwa na kuthibitishwa na benchi la ufundi kabla ya kipenga cha kwanza. Habariforum itakuletea mara moja kikosi kamili cha Yanga pindi kitakapotangazwa rasmi.
Mabedi Kufanya Mabadiliko Kwenye Kikosi
Habari njema kwa mashabiki wa Yanga ni kurejea kwa mshambuliaji hatari Clement Mzize, ambaye alikuwa nje kwa muda kutokana na majeraha. Mzize, aliyekuwa kinara wa mabao msimu uliopita, sasa yupo fiti na ana nafasi kubwa ya kuanza leo. Urejeo wake unatarajiwa kuongeza nguvu kwenye safu ya ushambuliaji sambamba na Andy Boyeli au Prince Dube.
Kwa mujibu wa kocha Mabedi, Yanga itacheza kwa kasi zaidi kwenye winga na kutumia vyema nafasi ndogo watakazozipata. Hii inaweza kumaanisha kuwa Mohamed Doumbia au Mudathir Yahya wataanza benchi, huku Pacome Zouzoua akicheza kama kiungo mshambuliaji nyuma ya washambuliaji wa mbele.
Ngome ya Silver Strikers na Mkakati wa Wageni
Kocha wa Silver Strikers, Etson Kadenge Mwafulirwa, anatarajiwa kutumia tena wachezaji waliotoa ushindi kwenye mechi ya kwanza kama Ernest Petro, Andrew Joseph, McDonald Lameck, na Uchizi Vunga. Safu ya ulinzi itaongozwa na Nickson Mwase na Maxwell Paipi, huku George Chikooka akisimama langoni.
Yanga inatarajiwa kufanya kazi ya ziada kuvunja ukuta wa wapinzani hao ambao wameonyesha uimara mkubwa nyumbani kwao. Mabedi amekumbusha umuhimu wa kuanza vizuri na kupata mabao ya mapema ili kuepuka presha.
Mapendekezo ya Mhariri:
- Singida BS VS Flambeau Leo 25/10/2025 Saa Ngapi?
- Yanga Vs Silver Strikers Leo 25/10/2025 Saa Ngapi?
- Matokeo ya Azam vs KMKM Leo 24/10/2025
- Yanga SC Yatangaza Kuachana na Kocha Wake Romain Folz
- Timu Zilizofuzu Kombe la Dunia 2026
- Msimamo wa Ligi Kuu Zanzibar PBZ 2025/2026
- Matokeo ya Azam vs KMKM Leo 24/10/2025
- Pacome Anukia Kombe la Dunia Baada ya Ushindi 7-0 Dhidi ya Shelisheli
- Kaizer Chiefs Ya Thibitisha Kuachana na Kocha Nasreddine Nabi
