Wapinzani wa Simba Raundi ya Pili Ligi ya Mabingwa Afrika CAF

Wapinzani wa Simba Raundi ya Pili Ligi ya Mabingwa Afrika CAF

Simba SC imetinga kwa mbinde raundi ya pili ya Ligi ya Mabingwa Afrika CAF baada ya kulazimishwa sare ya bao 1-1 na Gaborone United ya Botswana katika Uwanja wa Benjamin Mkapa, Dar es Salaam, Jumapili, Septemba 28, 2025.

Matokeo hayo yameihakikishia Simba kusonga mbele kwa ushindi wa jumla wa mabao 2-1, ikibebwa na ushindi wa bao 1-0 ilioupata katika mechi ya kwanza ugenini wiki moja iliyopita. Kwa maana hiyo, sasa wekundu wa Msimbazi wanasubiri wapinzani wao wa raundi ya pili, ambao ni Nsingizini Hotspurs ya Eswatini.

Safari ya Simba Dhidi ya Gaborone United

Katika mchezo wa leo, Simba ilitangulia kupata bao katika dakika ya 43 kupitia kwa Jean Charles Ahoua aliyefunga kwa mkwaju wa penalti. Penalti hiyo ilitokana na Morice Abraham kuangushwa ndani ya eneo la hatari la Gaborone United. Bao hilo liliwapa Simba matumaini hadi mapumziko, lakini bado mchezo haukuwa rahisi.

Kipindi cha pili kilishuhudia Gaborone United ikirudi kwa kasi na kuandamwa lango la Simba mara kwa mara. Shinikizo lao lilizaa matunda dakika ya 66 walipopewa penalti baada ya Thabo Maponda kuchezewa vibaya na beki Chamou Karaboue. Lebogang Ditsele aliwafungia bao la kusawazisha, na kurejesha matumaini ya wageni.

Hata hivyo, licha ya presha kubwa na nafasi kadhaa zilizopotezwa, hususan kupitia Thatayaone Kgamanyane na Maponda, Gaborone United haikuweza kupata bao la pili. Mechi ilimalizika kwa sare ya 1-1 na Simba ikapenya kwa faida ya ushindi wa awali ugenini.

Wapinzani wa Simba Raundi ya Pili Ligi ya Mabingwa Afrika CAF

Baada ya kutinga raundi ya pili, Simba sasa itakutana na Nsingizini Hotspurs ya Eswatini, timu iliyofanikiwa kuitoa Simba Bhora ya Zimbabwe kwa njia ya mikwaju ya penalti.

Katika safari yao, Nsingizini Hotspurs walishinda nyumbani kwa bao 1-0, wakiwafutia machozi mashabiki baada ya kufungwa kwa matokeo sawa walipokuwa ugenini. Hali hiyo ilisababisha mechi kuamuliwa kwa penalti, ambapo wenyeji waliibuka na ushindi wa mabao 4-2.

Hivyo basi, Nsingizini Hotspurs sasa wanakuwa wapinzani rasmi wa Simba katika raundi ya pili ya Ligi ya Mabingwa Afrika CAF, mechi ambazo zinatarajiwa kuchezwa kati ya Oktoba 17 na 26, 2025.

Changamoto Inayomsubiri Simba

Kwa mujibu wa ratiba ya mashindano, raundi ya pili itakuwa hatua muhimu kwa Simba kwani itatoa nafasi ya kuingia hatua ya makundi. Hii ni hatua yenye ushindani mkali, ambapo kila kosa linaweza kugharimu safari ya timu.

Nsingizini Hotspurs, licha ya kuwa na jina dogo katika ramani ya soka la Afrika, wameonyesha uthabiti kwa kuondoa wapinzani wao kupitia mikwaju ya penalti. Simba inapaswa kuchukua tahadhari kubwa, kuhakikisha wanatumia vyema uzoefu wao wa kimataifa na kujipanga vizuri ili kuepuka mshangao.

Timu za Tanzania Zilizofuzu

Mbali na Simba, klabu nyingine za Tanzania pia zimeonyesha makali katika mashindano haya ya CAF. Yanga SC, Singida BS na KMKM tayari zimepiga hatua kuingia raundi ya pili, huku Azam FC ikibakiza mechi muhimu dhidi ya Al Merreikh Bentiu ya Sudan Kusini. Azam inatazamiwa kufuzu pia baada ya kuongoza kwa jumla ya mabao 3-0 kutokana na ushindi wa awali ugenini na bao moja nyumbani.

Mapendekezo ya Mhariri:

1. Matokeo ya Simba vs Gaborone Leo 28/09/2025
2. Ratiba ya Mechi za Leo 28/09/2025
3. Singida Black Stars Yatinga Raundi Ya Pili Kombe la Shirikisho Afrika
4. Real Madrid Yapoteza 2-5 Dhidi ya Atletico Madrid, Kichapo cha Kwanza kwa Xabi Alonso LaLiga
5. Haaland Sasa ni Miongoni mwa Wafungaji Bora 10 wa Muda Wote Man City
6. Yanga Yatinga Raundi ya Pili CAF Champions League Baada ya Ushindi wa 2-0
7. KMKM Yatinga Raundi ya Pili ya CAF Baada ya Kuichapa AS Port ya Djibouti
8. Viingilio Mechi ya Yanga vs Wiliete SC 27/09/2025