Simba na Yanga Bado Zashikana Mashati Vita ya Ubingwa Ligi Kuu NBC 2025
MWENDO wa weka niweke uliendelea kushika kasi katika mechi za raundi ya 29 ya Ligi Kuu NBC Tanzania Bara zilizopigwa Jumatano hii, huku kila timu ikisaka nafasi salama — iwe ni katika mbio za ubingwa au kujinasua na janga la kushuka daraja.
Baada ya KenGold na Kagera Sugar kuthibitishwa kushuka daraja moja kwa moja, macho yote sasa yanaelekezwa kwenye mapambano ya kileleni ambapo Simba na Yanga bado zipo bega kwa bega katika mbio za ubingwa.
Katika hali ya kipekee inayodhihirisha ushindani wa kweli wa Ligi Kuu NBC 2025, vigogo wawili wa soka la Tanzania, Simba SC na Yanga SC, walionesha moto wa ushindani kwa kila mmoja kuibuka na ushindi mnono wa mabao 5-0 dhidi ya wapinzani wao katika mechi zao za Jumatano.
Yanga Yaendeleza Uongozi wa Ligi
Yanga SC, ambayo imekuwa ikiongoza msimamo wa ligi, ilicheza dhidi ya Tanzania Prisons kwenye Uwanja wa Sokoine, Mbeya. Wakiwa na lengo la kulinda nafasi ya kileleni, walionyesha kiwango cha juu kwa kuibuka na ushindi wa mabao 5-0, kupitia mabao yaliyofungwa na:
- Mudathir Yahya (dakika ya 31)
- Clatous Chama (dk 35)
- Pacome Zouzoua (dk 56 na 76)
- Israel Mwenda (dk 61)
Bao la kwanza la Yanga lilifungwa muda mfupi baada ya Simba kuwa mbele kwa mabao 3-0, hali iliyowarejesha haraka kileleni mwa msimamo kwa tofauti ya pointi moja.
Simba Nayo Yapiga KenGold 5-0
Wakati Yanga wakifanya yao Mbeya, Simba SC walikuwa wakicheza dhidi ya KenGold kwenye Uwanja wa Ali Hassan Mwinyi, Tabora. Kwa dakika chache, Simba waliongoza ligi baada ya kuongoza kwa mabao 3-0 mapema kipindi cha kwanza. Mabao ya Wekundu wa Msimbazi yalifungwa na:
- Kibu Denis (dk 20 na 26)
- Elie Mpanzu (dk 22)
- Leonel Ateba (dk 36)
- Jean Charles Ahoua (dk 75)
Hata hivyo, furaha hiyo ya muda mfupi ilizimwa pale Yanga waliporudisha bao lao la kwanza dakika ya 31, na hatimaye kuhitimisha mechi yao kwa ushindi kama wao wa 5-0.
Msimamo wa Ligi Kuu NBC 2025 Wazidi Kupamba Moto
Wakati raundi ya 29 ikielekea ukingoni, Yanga walikuwa na pointi 73 dhidi ya Simba waliokuwa na 72. Ushindi wa mabao matatu ya haraka kwa Simba uliwaweka kileleni kwa muda kwa kufikisha pointi 75, kabla ya Yanga kurejesha uongozi wao kwa kufikisha pointi 76 baada ya bao la kwanza la Mudathir. Hali hii imefanya mbio za ubingwa kuendelea kuwa kali na za kusisimua, kwani tofauti ya pointi ni ndogo mno, huku kila goli likiwa na umuhimu mkubwa kwa uongozi wa ligi.
Mechi Nyingine za Mzunguko wa 29: Mapambano Yaendelea
Licha ya kivutio kikuu kuwa kwenye vita ya ubingwa kati ya Simba na Yanga, mechi nyingine pia zilikuwa na matokeo yenye mvuto wa kipekee:
Azam FC Yaiangamiza Tabora United 5-0
Azam FC walipata ushindi mnono wa 5-0 dhidi ya Tabora United kwenye Uwanja wa Azam Complex. Mabao yalifungwa na:
- Abdul Suleiman ‘Sopu’ (dk 11)
- Gibril Sillah (dk 17 na 30)
- Idd Seleman ‘Nado’ (dk 45+1)
- Nassor Saadun (dk 89)
Azam sasa imejihakikishia nafasi ya tatu kwa kuwa na pointi 60.
Dodoma Jiji 1-2 Singida Black Stars
Singida Black Stars waliichapa Dodoma Jiji mabao 2-1 kupitia:
- Arthur Bada (dk 1)
Jonathan Sowah (dk 6, penalti)
Bao la kufutia machozi la Dodoma lilifungwa na Idd Kipagwile (dk 41, penalti). Sowah anaendelea kung’ara na sasa ana mabao 12 katika mechi 13.
Coastal Union 1-0 Fountain Gate
Coastal Union walijihakikishia usalama kwa ushindi wa 1-0 dhidi ya Fountain Gate kupitia penalti ya Lucas Kikoti dakika ya 60.
Mashujaa 1-1 KMC
Bao la dakika ya 90 la Akram Mhina wa KMC liliwaokoa dhidi ya Mashujaa waliokuwa mbele kwa bao la Mundhir Vuai (dk 11).
Pamba Jiji 1-0 JKT Tanzania
Zabona Mayombya aliipa Pamba Jiji ushindi muhimu kwa bao dakika ya 40, likifufua matumaini yao ya kusalia kwenye ligi.
Namungo 0-0 Kagera Sugar
Mchezo pekee uliomalizika kwa suluhu bila bao, ukiwafanya Namungo wabaki katika presha ya play off huku Kagera tayari wakishuka daraja.
Mapendekezo ya Mhariri:
- Tetesi Za Usajili Simba Leo 2025/2026
- Genaro Gattuso Ateuliwa Kuwa Kocha Mpya wa Timu ya Taifa ya Italia 2025
- Bayern Munich Yaitandika Auckland City Magoli 10–0 Kombe la Dunia la Vilabu FIFA
- Mechi Dhidi ya Coastal Union na Azam FC Kuamua Hatma ya Fountain Gate Ligi Kuu
- Ratiba ya Kombe la Dunia la Vilabu 2025
- Form Five Selection 2025: Majina Waliochaguliwa Kidato cha Tano 2025/2026 Yatangazwa!
- Al Ahly Yatoka Sare na Inter Miami ya Messi Kombe la Dunia la Vilabu FIFA 2025
