Diarra Afungiwa Mechi 3 na Kutozwa Milioni 2 kwa Utovu wa Nidhamu
Golikipa wa klabu ya Young Africans SC, Djigui Diarra, amefungiwa michezo mitatu na kutozwa faini ya jumla ya Shilingi milioni nne kufuatia makosa mawili ya utovu wa nidhamu aliyoyafanya baada ya mchezo wa sare ya 1-1 dhidi ya Mtibwa Sugar FC uliochezwa kwenye Uwanja wa Jamhuri, Dodoma.
Adhabu hiyo imetangazwa rasmi Machi 27, 2026 na Kamati ya Usimamizi na Uendeshaji wa Ligi ya NBC Premier League, kufuatia kikao chake kilichofanyika Machi 26, 2026, ambapo tukio hilo lilijadiliwa kwa mujibu wa kanuni za ligi.
Kwa mujibu wa taarifa ya kamati hiyo, Diarra alipatikana na hatia ya makosa mawili tofauti ya kinidhamu yaliyotokea mara baada ya kumalizika kwa mchezo huo. Kipa huyo alifungiwa mechi tatu na kutozwa faini ya Shilingi milioni mbili kwa kosa la kumshambulia mwamuzi wa kati wa mchezo huo, huku pia akitozwa faini nyingine ya Shilingi milioni mbili kwa kosa la kuonyesha ishara ya matusi wakati akitoka uwanjani.
Adhabu hiyo imetolewa kwa kuzingatia Kanuni ya 41:5(5.3) ya Ligi Kuu Tanzania Bara, inayofafanua hatua zinazochukuliwa kwa mchezaji anayepatikana na hatia ya utovu wa nidhamu dhidi ya mwamuzi au mtu yeyote ndani ya mchezo. Kanuni hiyo inaeleza kuwa mchezaji anaweza kufungiwa angalau mechi tatu na/au kutozwa faini isiyopungua Shilingi 500,000 hadi milioni mbili.
Katika hatua nyingine, mwamuzi wa kati wa mchezo huo, Gilbert Mrina kutoka Kilimanjaro, ameshushwa daraja la uamuzi baada ya kubainika kushindwa kuchukua hatua stahiki dhidi ya tukio hilo wakati wa mchezo. Aidha, mwamuzi msaidizi Abdulaziz Ally wa Arusha amefungiwa mizunguko mitano kwa kosa la kushindwa kutafsiri sheria ya kuotea.
Mbali na tukio hilo, kamati hiyo pia ilitangaza adhabu nyingine kwa klabu mbalimbali, ambapo Simba SC imetozwa faini ya Shilingi milioni 10 kufuatia mashabiki wake kuwarushia waamuzi chupa za maji katika mchezo dhidi ya Pamba Jiji. Vilevile, TRA United FC imetozwa faini ya Shilingi 500,000 baada ya wachezaji wake kuonyeshwa kadi zaidi ya tano katika mchezo dhidi ya Yanga.
Adhabu ya Diarra inaongeza changamoto kwa Young Africans SC katika mechi zijazo za ligi, ikizingatiwa nafasi yake muhimu ndani ya kikosi hicho. Uamuzi huo pia unaonyesha msimamo wa mamlaka za ligi katika kusimamia nidhamu na kuhakikisha sheria za mchezo zinazingatiwa kikamilifu katika mashindano ya ligi kuu.
Mapendekezo ya Mhariri:
