KENGOLD Yapanga Kuipeleka Simba Ruvuma Juni 18
Kikosi cha KenGold, kilichoteremka mapema kutoka Ligi Kuu Tanzania Bara msimu huu wa 2024/2025, kimeweka wazi mpango wa kuipeleka mechi yake dhidi ya mabingwa watetezi Simba SC katika Uwanja wa Majimaji uliopo Songea, mkoani Ruvuma. Mchezo huo wa Ligi Kuu umepangwa kufanyika Juni 18, iwapo taratibu za ukaguzi na uthibitisho wa uwanja huo zitakamilika kwa wakati.
Uamuzi wa kusaka makazi mbadala umetokana na sababu ya kuingiliana kwa ratiba ya matumizi ya Uwanja wa Sokoine uliopo Mbeya, ambao kwa kawaida hutumika kama uwanja wa nyumbani wa KenGold. Uwanja huo umetengwa kwa ajili ya mechi nyingine itakayowakutanisha Tanzania Prisons dhidi ya Yanga SC siku hiyo hiyo ya Juni 18.
Katika mahojiano na Mwanaspoti, Ofisa Habari wa KenGold, Joseph Mkoko, alieleza kuwa bado ni mapema kutoa tamko rasmi kuhusu uwanja ambao utatumika kwa mechi dhidi ya Simba, lakini akasisitiza kuwa taratibu bado zinaendelea na taarifa kamili itatolewa mara baada ya mchakato kukamilika. Alibainisha kuwa kwa sasa nguvu zote zimeelekezwa katika maandalizi ya mchezo dhidi ya Pamba Jiji utakaochezwa Mei 13.
“Kwa sasa tunaendelea na maandalizi ya mechi yetu dhidi ya Pamba Jiji tutakayocheza Mei 13, kisha baada ya hapo tutakuwa na wigo mpana wa kuzungumzia uwanja tutakaotumia dhidi ya Simba, kwa sasa tuvute subra na mambo yatakapokamilika tutaweka wazi,” alisema Mkoko.
Taarifa kutoka kwa vyanzo vya ndani ya klabu hiyo zinaeleza kuwa viongozi wa KenGold tayari wameanza mawasiliano rasmi na mamlaka husika ili kuhakikisha wanapata kibali cha kutumia Uwanja wa Majimaji—ambao ni makazi ya klabu ya Songea United inayoshiriki Ligi ya Championship msimu huu.
Katika hali inayoashiria kujitahidi kwa hali na mali kuhitimisha msimu kwa heshima, Kocha Mkuu wa KenGold, Omary Kapilima, ameeleza kuwa licha ya kupoteza nafasi yao kwenye Ligi Kuu, kikosi chake bado kinapambana kumaliza msimu kwa weledi. Hata hivyo, alikiri kuwa hali ya kisaikolojia kwa baadhi ya wachezaji si thabiti kutokana na matokeo mabaya yaliyowakumba.
Hadi sasa, KenGold inashika nafasi ya mwisho kwenye msimamo wa ligi ikiwa na pointi 16 pekee, baada ya kucheza jumla ya mechi 27 ambapo walishinda mechi 3, kutoka sare mechi 7 na kupoteza 17. Timu hiyo imesalia na mechi tatu pekee kabla ya kukamilisha msimu wake wa kwanza na wa kihistoria kwenye Ligi Kuu na kurejea Championship, ligi ambayo walitwaa ubingwa msimu uliopita na kupanda kwa mara ya kwanza pamoja na timu ya Pamba Jiji ambayo ilirejea ligi kuu baada ya kupotea kwa zaidi ya miongo miwili tangu 2001.
Mapendekezo ya Mhariri:
- Simba SC Yakata Tiketi Ligi ya Mabingwa Afrika 2025-2026 Baada ya Kufikisha Pointi 66
- Yanga Yashikilia Msimamo wa Kutocheza Dabi Licha Ya Majibu ya CAS
- Simba Yaitandika JKT na Kujiweka Kwenye Njia ya Ligi ya Mabingwa
- Matokeo JKT Tanzania vs Simba Leo 05/05/2025
- Sababu 3 Zilizofanya CAS Kuitupilia Mbali Kesi ya Yanga
- Shauri la Yanga CAS Lapigwa Chini, Kariakoo Derby kupangiwa Tarehe
