Liverpool Wafanikiwa Kuwa Mabingwa EPL 2024/2025

Liverpool Wafanikiwa Kuwa Mabingwa EPL 2024/2025

Liverpool ni mabingwa wapya wa Ligi Kuu England msimu wa 2024/2025 baada ya ushindi mnono wa mabao 5-1 dhidi ya Tottenham Hotspur katika dimba la Anfield. Mafanikio hayo yameiwezesha klabu hiyo kufikisha taji lake la 20 katika historia ya Ligi Kuu England, na hivyo kuifikia Manchester United kama vinara wa muda wote wa mataji ya ligi hiyo. Ushindi huo, uliopatikana Jumapili, Aprili 27, 2025, umeipa Liverpool alama 82 zikiwa zimebaki mechi nne, kutokana na ushindi wa mechi 25, sare saba na vichapo viwili pekee.

Kwa msimu huu, Liverpool imeonyesha ubora wa hali ya juu kwa kuwa timu iliyofunga mabao mengi zaidi (80) na kuwa timu ya pili kwa kupokea mabao machache (32), nyuma ya Arsenal waliopokea mabao 29 pekee.

Mafanikio haya yamechochewa na mchango mkubwa wa mshambuliaji wao nyota, Mohammed Salah, ambaye ndiye kinara wa mabao (28) na pasi za mabao (18), akihitimisha msimu wake kwa kiwango cha juu.

Arne Slot Aandika Historia Katika Msimu Wake wa Kwanza

Kocha mpya wa Liverpool, Mholanzi Arne Slot, ameweka historia kwa kutwaa taji la Ligi Kuu England katika msimu wake wa kwanza, hatua inayomfanya kuwa kocha wa kwanza kutoka Uholanzi kufanya hivyo. Mbali na mafanikio hayo, Slot alifanya usajili wa mchezaji mmoja pekee—Federico Chiesa—lakini bado ameiongoza timu yake kwa mafanikio makubwa, akifanikisha rekodi ya kushinda michezo 25 kati ya 34, sare 7 na kupoteza miwili tu.

Ushindi dhidi ya Tottenham ulihusisha mabao ya Luiz Diaz (16’), Alexis MacAllister (24’), Cody Gakpo (34’), Mohammed Salah (62’) pamoja na bao la kujifunga la Destiny Udogie (68’). Gakpo, baada ya kufunga bao lake, alivua jezi na kuonesha ujumbe uliosomeka “Welcome to Jesus,” hatua iliyomgharimu kadi ya njano. Bao pekee la Spurs lilifungwa na Dominic Solanke katika dakika ya 12.

Shangwe kubwa zilitawala jiji la Liverpool na ndani ya uwanja wa Anfield, ambapo mashabiki walisherehekea kwa nyimbo na furaha isiyoelezeka. Baada ya miaka mitano tangu kutwaa ubingwa wa EPL mara ya mwisho (2019/2020), mafanikio haya yanaiweka Liverpool katika nafasi ya juu zaidi katika historia ya soka ya Uingereza, wakifikisha mataji 52 ya juu kwa upande wa soka la wanaume.

Kwa sasa, Liverpool itakabidhiwa rasmi kombe la EPL katika mchezo wao wa mwisho dhidi ya Crystal Palace, Jumapili tarehe 25 Mei, 2025, katika dimba hilo hilo la Anfield.

Takwimu Muhimu za Msimu kwa Liverpool

• Msimamo: Nafasi ya 1 kati ya timu 20
• Mechi: 34
• Ushindi: 25
• Sare: 7
• Kipigo: 2
• Magoli yaliyofungwa: 80
• Magoli yaliyoruhusiwa: 32
• Tofauti ya magoli: +48
• Pointi: 82

Ushindani Msimu Huu: Arsenal na Newcastle Walifuatia Mbali

Wakati Liverpool wakikamata kileleni kwa tofauti kubwa, Arsenal walishika nafasi ya pili kwa alama 67, huku Newcastle United wakiwa wa tatu kwa pointi 62. Manchester City na Chelsea walifunga tano bora kwa pointi 61 na 60 mtawalia. Hii inaonesha wazi jinsi Liverpool walivyotawala msimu huu kwa ustadi wa hali ya juu.

Mapendekezo ya Mhariri:

1. Ratiba ya Fainali Kombe La Shirikisho Afrika CAF 2024/2025
2. Simba SC Yatinga Fainali Kombe la Shirikisho Afrika Baada ya Sare na Stellenbosch
3. Matokeo ya Stellenbosch VS Simba SC Leo 27 April 2025
4. Kikosi cha Simba SC vs Stellenbosch Leo 27 April 2025
5. Stellenbosch VS Simba SC Leo 27 April 2025 Saa Ngapi?
6. Mayele Aipeleka Pyramid Fainali Klabu Bingwa Afrika CAF
7. Al Ahly Yamtimua Kocha Marcel Koller Baada ya Kutolewa Klabu Bingwa Afrika