Matokeo ya Yanga Vs Copco FC Leo 25/01/2025

Matokeo ya Yanga Vs Copco FC Leo 25/01/2025 | Matokeo ya Yanga Leo Dhidi ya Copco FC

Kikosi cha Yanga leo, tarehe 25 Januari 2025, kitashuka dimbani kwenye Uwanja wa KMC Complex kupambana na Copco FC katika mchezo wa raundi ya tatu ya Kombe la Shirikisho, maarufu kama CRDB Bank Federation Cup. Mechi hii ya mtoano ni muhimu sana, kwani timu itakayoshindwa itaondolewa moja kwa moja kwenye mashindano haya makubwa ya pili kwa umuhimu nchini Tanzania. Michuano hii pia inatoa nafasi ya mwakilishi wa Tanzania katika mashindano ya kimataifa ya Kombe la Shirikisho Afrika.

Mabingwa watetezi Yanga wanakabiliwa na shinikizo kubwa baada ya kuondolewa kwenye michuano ya kimataifa ya Ligi ya Mabingwa Afrika. Kocha Mkuu wa Yanga, Sead Ramovic, amesisitiza kwamba kikosi chake kimejipanga kucheza kwa nguvu na kasi, sawa na jinsi wanavyoshindana kwenye Ligi Kuu Tanzania Bara na Ligi ya Mabingwa Afrika. Ramovic ameeleza kuwa hawataidharau Copco FC, licha ya kuwa timu ndogo kwa viwango, bali wataingia uwanjani kwa silaha zote ili kuhakikisha ushindi.

“Tunatakiwa kushinda mechi hii na pia kushinda kombe hili. Yanga siku zote ni timu ya ushindi. Tutacheza kwa nguvu kubwa, kasi ya kutisha, na kwa kutumia mbinu zote tulizonazo ili kufanikisha malengo yetu,” alisema Ramovic.

Kwa upande wa Copco FC, Kocha Mkuu wao, Lucas Mlingwa, ameonyesha matumaini makubwa ya kuibuka na matokeo mazuri. Akizungumza kabla ya mechi, Mlingwa alibainisha kuwa wameandaa mkakati wa kupunguza kasi ya wapinzani wao, Yanga, kwa kuimarisha ulinzi na kuhakikisha kila mchezaji anatimiza majukumu yake kwa umakini mkubwa.

“Tumejiandaa vya kutosha kwa ajili ya mechi hii. Tunafahamu Yanga ni timu kubwa na bora, lakini hiyo ni changamoto nzuri kwetu. Tumeweka mpango wa kufidia udhaifu wetu kwa kuhakikisha tunawazuia kucheza kwa nafasi walizozoea,” alisema Mlingwa.