Mbosso Avunja Rekodi za Burudani Simba Day Kwa Performance Bora Zaidi
Dar es Salaam. Jumatano, Septemba 10, 2025 Ingawa ilikuwa siku ya kazi kwa wengi, mashabiki wa klabu ya Simba walijikusanya kwa wingi Uwanja wa Benjamin Mkapa kusherehekea kilele cha tamasha la kila mwaka, Simba Day.
Tukio hilo liliambatana na utambulisho wa wachezaji wapya na benchi jipya la ufundi kuelekea msimu wa Ligi Kuu Bara, lakini kilichoteka hisia za mashabiki zaidi ni onyesho la mwanamuziki maarufu wa Bongo Fleva, Mbwana Yusuph Kirungi, anayefahamika zaidi kama Mbosso.
Kwa namna alivyoandaa na kutekeleza shoo yake, ilionekana wazi kuwa kama kungekuwa na tuzo ya “Man of the Show”, Mbosso ndiye angeibuka mshindi bila pingamizi. Onyesho hilo lilihitimisha kwa kishindo maadhimisho ya Simba Day, likiwaacha mashabiki wakisifia ubunifu na uwezo wa msanii huyo wa hit song Pawa.
Namna Mbosso Alivyoingia na Kuwasha Moto Mkapa
Mbosso aliibuka uwanjani kwa mtindo ambao wengi hawakuutarajia, ukikumbusha mandhari ya filamu maarufu Duniani ya Mad Max.
Saa 11:03 jioni, alitokea lango la Kaskazini Mashariki akiwa ameambatana na madansa zaidi ya 50 waliokuwa wamepambwa kwa rangi kwenye miili yao. Hapo awali, magari matatu yaliyopambwa kwa rangi yalikuwa yamewasili yakibeba baadhi ya wachezaji wake wa dansi, yakiongeza msisimko kwa hadhira.
Onyesho lilianza na wimbo “Selemani”, aliouimba kwa ustadi akiwa na kundi dogo la waigizaji waliotangulia mbele kama ilivyokuwa kwenye video ya wimbo huo aliomshirikisha Chley kutoka Afrika Kusini. Shangwe kubwa zilivuma mara tu alipoanza, mashabiki wakiimba naye kila mstari.
Safari ya Muziki: Kutoka “Sele” Hadi “Asumani”
Katika kipindi cha saa moja na dakika chache, Mbosso aliwasilisha burudani iliyopangiliwa kwa umahiri wa hali ya juu. Alipita kwenye mdundo wa nyimbo zake zilizotikisa ulimwengu wa mziki kama Kunguru, Moyo, Yataniua, Shetani, Ova, na Amepotea, kabla ya kuwavuta mashabiki zaidi na wimbo wa “Nusu Saa”, uliomuinua hata Mtendaji Mkuu wa Simba, Zubeda Sakuru, kuimba na kucheza kwa furaha.
Wimbo “Aviola” ulioshirikisha Bonge la Dada uliibua hisia kubwa, huku mashabiki wote wakisimama kushuhudia onyesho lisilosahaulika. Lakini upeo wa shoo ulikuja kupitia nyimbo mbili Pawa na Haijakaa Sawa ambazo Mbosso aliimba live, akionesha uwezo wa kipekee wa sauti na kuibua shangwe zisizokoma kutoka kwa maelfu ya wapenzi wake.
Kwa jumla, nyimbo 12 zilipigwa mfululizo: Sele, Kunguru, Moyo, Yataniua, Shetani, Ova, Haijakaa Sawa, Amepotea, Nusu Saa, Aviola, Pawa, na Asumani, aliyomalizia kwa ustadi mkubwa.
Ushirikiano na Alikiba na Baraka Kabla ya Jukwaa
Wakati wa kutumbuiza “Aviola”, Mbosso alipokea sapoti ya kipekee kutoka kwa msanii nguli Alikiba, ambaye alizunguka uwanja akihamasisha mashabiki kushangilia. Kabla ya kupanda jukwaani, Mbosso alifichua kuwa Alikiba alimpa baraka na ushauri, jambo lililompa motisha kubwa kwa siku hiyo muhimu. “Ndoto yangu ilikuwa siku moja kutumbuiza kwenye kilele cha Simba Day. Leo nimetimiza ndoto hiyo, na ninamshukuru kaka yangu Alikiba kwa baraka alizonipa kabla sijapanda stejini,” alisema Mbosso.
Mashabiki Wavyopongeza Onyesho
Mara baada ya onyesho, mitandao ya kijamii ilifurika na pongezi kwa ubunifu na uwezo wa Mbosso. Baadhi ya mashabiki waliandika:
“Show hii ya Mbosso Mkapa imevunja rekodi! Hakuhitaji kusema ‘imba nami’ au ‘twende kushoto’ – kila mtu aliimba naye mwanzo hadi mwisho.”
“Tokea tupate uhuru mwaka 1964, huyu ndiye msanii wa kwanza kufanya show kali namna hii uwanjani.”
Wengine waliendelea kumuita “Mjukuu wa Taifa”, wakimpongeza kwa kujitolea na heshima aliyoonesha kwa mashabiki wake na timu ya Simba.
Tamasha la Simba Day 2025 litabaki kwenye kumbukumbu za mashabiki si tu kwa sababu ya utambulisho wa wachezaji wapya, bali pia kutokana na shoo ya kipekee ya Mbosso. Kwa ubunifu, sauti ya kipekee, na uwezo wa kuunganisha mashabiki kupitia muziki, Mbosso bila shaka amevunja rekodi za burudani Simba Day kwa performance bora zaidi.
Onyesho hilo limeweka viwango vipya vya ubora kwenye matamasha ya burudani Tanzania, na kuthibitisha kwamba Mbosso ni mmoja wa wasanii wanaoandika historia katika muziki wa Bongo Fleva.
Mapendekezo ya Mhariri:
- Ratiba ya NBC Premier league 2025/2026
- Kikosi cha Simba Sc 2025/2026
- Timu Zilizofuzu Kombe la Dunia 2026
- Safari ya Ronaldo Kuelekea Mabao 1000 Yafikia Hatua Mpya Baada Kufunga Dhidi Hungary
- Azam FC Yawapa Mkono wa Kwaheri Wanne Kwa Mpigo
- Ratiba ya Ngao ya Jamii 2025/2026
- Kikosi cha Yanga 2025/2026 | Wachezaji Wote wa Yanga
- Kikosi cha Timu ya Taifa Wanawake U20 Kilichoitwa Kambini September 2025
