Simba Yamalizana na Kiungo Balla Moussa Conte Kutokea CS Sfaxien

Simba Yamalizana na Kiungo Balla Moussa Conte Kutokea CS Sfaxien

Wekundu wa Msimbazi Simba SC wamemalizana na kiungo mahiri wa ulinzi Balla Moussa Conte kutokea klabu ya CS Sfaxien ya Tunisia, huku wakilenga kuimarisha safu ya kati kuelekea msimu mpya wa mashindano ya ndani na kimataifa.

Kiungo huyo raia wa Guinea mwenye umri wa miaka 21, leo Ijumaa, Julai 11, 2025, ametangazwa rasmi kuwa sehemu ya kikosi cha Simba baada ya mabosi wa klabu hiyo kuvunja mkataba wake uliokuwa unaendelea hadi mwaka 2026 na CS Sfaxien, na kufanikisha usajili wake kuelekea msimu ujao.

Conte ameibuka kuwa mchezaji wa kutegemewa katika kikosi cha CS Sfaxien, moja ya klabu kongwe nchini Tunisia. Katika msimu wa 2024/2025, amekuwa chaguo la kwanza kwenye safu ya kiungo wa ulinzi, akionekana kuwa mhimili mkubwa wa kikosi hicho kilichoshiriki hatua ya makundi ya Kombe la Shirikisho Afrika.

Katika Ligi Kuu ya Tunisia, Conte alicheza jumla ya mechi 23 katika msimu uliomalizika, akionyesha ukomavu mkubwa licha ya umri wake mdogo. Katika kipindi hicho, alionyeshwa kadi saba za njano, jambo linaloashiria namna anavyocheza kwa nguvu na kujituma kwa ajili ya timu.

Kwa upande wa michuano ya kimataifa, Conte ameonekana katika mechi sita za Kombe la Shirikisho Afrika na nyingine mbili za Kombe la Klabu Bingwa kwa Nchi za Kiarabu, na kufanya idadi ya mechi zake rasmi akiwa na Sfaxien kufikia 34 kwenye Ligi Kuu ya Tunisia.

Usajili wa Balla Moussa Conte ni sehemu ya mikakati ya Simba ya kufanya mabadiliko ya msingi katika kikosi chake, hasa kwenye eneo la kiungo wa ulinzi. Tayari klabu hiyo imeshatangaza kuachana na nyota wake wawili waliokuwa wakicheza nafasi hiyo — Fabrice Ngoma na Augustine Okejepha.

Kwa kuwasajili nyota wapya kama Conte, Simba inaonekana kujiandaa kwa nguvu mpya kuhakikisha inakuwa tishio katika michuano ya Ligi Kuu NBC Tanzania Bara, Kombe la FA, na vilevile mashindano ya kimataifa kama CAF Champions League msimu wa 2025/2026.

Mapendekezo ya Mhariri:

1. Kocha Mpya wa Yanga 2025/2026: Siri Yafichuka Jangwani!
2. Singida BS Yamnyatia Kipa wa Simba Hussein Abel Baada ya Kumaliza Mkataba
3. Wachezaji 6 wa KMC Wasubiri Hatima Yao Kufuatia Mikataba Kumalizika
4. Kennedy Musonda Atimkia Israel Baada ya Kumaliza Mkataba na Yanga
5. Tetesi Za Usajili Yanga Leo 2025/2026
6. Tetesi Za Usajili Simba Leo 2025/2026
7. Matokeo ya Ualimu Ngazi ya Cheti 2025 (NECTA GATCE Results)
8. PSG Yatinga Nusu Fainali Baada ya Kuichapa Bayern Munich 2-0 Marekani