Sergio Busquets Atangaza Kustaafu Soka Mwishoni Mwa Msimu Huu

Sergio Busquets Atangaza Kustaafu Soka Mwishoni Mwa Msimu Huu

Kiungo wa zamani wa FC Barcelona na sasa Inter Miami, Sergio Busquets, ametangaza rasmi kuwa tundika daruga mwishoni mwa msimu huu wa Ligi Kuu ya Marekani (MLS). Tangazo hili limewashangaza mashabiki wengi, kwani mchezaji huyo mwenye umri wa miaka 37 amehusiana na mafanikio makubwa katika soka kwa zaidi ya miongo miwili.

Kupitia taarifa rasmi ya Inter Miami pamoja na video ya hisia aliyoichapisha kwenye mitandao ya kijamii, Busquets alithibitisha uamuzi huo na kuwashukuru wachezaji wenzake, vilabu alivyowahi kuvitumikia na mashabiki waliompa sapoti katika safari yake ya kipekee.

Akizungumzia safari yake kutoka Badía, kupitia akademi ya La Masia, hadi kilele cha mafanikio na Barcelona pamoja na timu ya taifa ya Hispania, Busquets alisema:

“Nimefurahia safari hii, sasa ni wakati wa kusema kwaheri.”

Busquets ataendelea kukumbukwa kama mhimili wa kile kinachoitwa na wengi “Barcelona bora zaidi katika historia.” Akiwa na klabu hiyo ya Catalonia, alinyanyua makombe ya Ligi ya Mabingwa Ulaya (UEFA Champions League), La Liga, Copa del Rey pamoja na Supercopa, akicheza nafasi ya kiungo wa ulinzi kwa ustadi usio na mfano.

Kwa zaidi ya miaka 15, jina la Busquets lilikuwa tafsiri ya uweledi wa kiufundi, uongozi wa kimyakimya na usawa wa kikosi. Uwezo wake wa kusoma mchezo, kutabiri hatua za wapinzani na kuanzisha mashambulizi ulimfanya kuwa mmoja wa viungo wa ulinzi bora zaidi duniani.

Hata baada ya mafanikio yote hayo, alibaki mwaminifu kwa Barcelona hadi alipohamia MLS mwaka 2023, akijiunga tena na wachezaji wenzake wa zamani Lionel Messi, Jordi Alba na Luis Suárez.

Mafanikio na Timu ya Taifa ya Hispania

Safari ya Busquets haikujikita Barcelona pekee. Akiwa na La Roja, alicheza Kombe la Dunia mara nne. Kilele kilikuwa mwaka 2010 nchini Afrika Kusini alipokuwa sehemu muhimu ya kikosi kilichoshinda Kombe la Dunia la FIFA kwa mara ya kwanza katika historia ya Hispania. Miaka miwili baadaye, aliongeza taji la Euro 2012, na kuendeleza enzi ya dhahabu ya taifa hilo.

Kwa jumla, alichezea Hispania mechi zaidi ya 140, huku michuano ya Kombe la Dunia Qatar 2022 ikiwa ya mwisho kwake kimataifa. Mwaka 2011, alitunukiwa pia Medali ya Dhahabu ya Royal Order of Sporting Merit, heshima ya juu kabisa ya michezo nchini Hispania.

Akiwa na umri wa miaka 37, Sergio Busquets atastaafu soka mwishoni mwa msimu huu, akiacha urithi uliojengwa juu ya ubora, nidhamu na mafanikio ya kifahari. Ingawa ameshinda kila kitu barani Ulaya, alibaki kuwa mfano wa mchezaji asiye na makelele mengi lakini mwenye mchango mkubwa uwanjani.

Urithi wake utabaki si tu kwenye makombe, bali pia kwenye mchango wake wa kubadilisha taswira ya nafasi ya kiungo wa ulinzi duniani. Busquets aligeuza urahisi kuwa sanaa, na kwa hakika ataendelea kukumbukwa kama mmoja wa majina yaliyoandikwa kwa herufi za dhahabu kwenye historia ya soka la dunia.

 

View this post on Instagram

 

A post shared by Sergio Busquets (@5sergiob)

Mapendekezo ya Mhariri:

1. Msimamo wa Ligi kuu NBC Tanzania 2025/2026
2. Wafungaji Bora Ligi Kuu ya NBC Tanzania 2025/2026
3. Uwanja wa Jamhuri Dodoma Kuwa Makazi Mapya ya Mtibwa Sugar
4. Simba Yaanza Ligi Kuu 2025/26 Kwa Ushindi wa 3-0 Dhidi ya Fountain Gate
5. Matokeo ya Simba vs Fountain Gate Leo 25/09/2025
6. Ibenge Afungua Kampeni za Ligi Kuu kwa Ushindi wa 2-0 Dhidi ya Mbeya City
7. Simba vs Fountain Gate Leo 25/09/2025 Saa Ngapi?
8. Vilabu Bora Afrika 2025 (CAF Club Ranking 2025)