Rais Mwinyi Aahidi Mamilioni Kwa Simba Wakishinda Kombe la Shirikisho

Rais Mwinyi Aahidi Mamilioni Kwa Simba Wakishinda Kombe la Shirikisho

Unguja. Rais wa Zanzibar na Mwenyekiti wa Baraza la Mapinduzi, Dk. Hussein Ali Mwinyi, ameahidi kuipatia Klabu ya Simba zawadi ya Dola za Marekani 100,000 (sawa na Shilingi milioni 269 za Kitanzania) iwapo itafanikiwa kutwaa ubingwa wa Kombe la Shirikisho Barani Afrika mwaka huu. Ahadi hii imekuja ikiwa ni sehemu ya hamasa na motisha kwa wachezaji kuelekea mechi yao ya kihistoria dhidi ya RS Berkane ya Morocco.

Mechi ya Fainali Kufanyika Zanzibar – Rais Mwinyi Mgeni Rasmi

Fainali hiyo muhimu itapigwa kesho, Jumapili ya Mei 25, 2025, saa 10:00 jioni katika Uwanja wa New Amaan Complex, Zanzibar. Rais Mwinyi atakuwa mgeni rasmi katika tukio hilo kubwa la michezo, ambalo linatazamiwa kuvuta hisia za mashabiki kutoka pande zote za Jamhuri ya Muungano wa Tanzania.

Katika hatua ya kuonyesha kuunga mkono jitihada za Simba, Rais Mwinyi amelipia asilimia 15 ya gharama za uwanja ambazo klabu hiyo ilikuwa inatakiwa kulipa. Uamuzi huu ni ishara ya dhamira ya Serikali ya Mapinduzi ya Zanzibar (SMZ) kuunga mkono maendeleo ya michezo nchini.

Dk. Mwinyi alitoa ahadi hiyo ya kifedha alipokutana na viongozi pamoja na wachezaji wa Simba katika Hoteli ya Madinat Al Bahr, jioni ya Mei 24, 2025. Katika kikao hicho, Rais aliwapongeza kwa mafanikio ya kufika hatua ya fainali na kuwatia moyo kuwa na ari, nidhamu, na kujiamini wanapokabiliana na timu pinzani.

Aliwahakikishia kuwa serikali zote mbili – Serikali ya Mapinduzi ya Zanzibar (SMZ) na Serikali ya Jamhuri ya Muungano wa Tanzania (SMT) – zinaunga mkono juhudi za klabu hiyo, ambazo zimeileta heshima kubwa kwa taifa.

Wito kwa Mashabiki: Simameni na Simba kwa Moyo Mmoja

Katika salamu zake kwa mashabiki wa mpira wa miguu nchini, Dk. Mwinyi ametoa wito wa kuiunga mkono Simba kwa moyo mmoja. Amehimiza mashabiki kujitokeza kwa wingi na kuishangilia timu hiyo kwa nguvu zote, ili kuwapa wachezaji motisha inayohitajika katika kutimiza azma ya kutwaa ubingwa wa Afrika kwa mara ya kwanza katika historia ya klabu hiyo.

Historia: Simba Yarejea Fainali Baada ya Miaka 32

Hii ni mara ya pili kwa Simba kufika hatua ya fainali katika mashindano ya CAF, ikiwa ni zaidi ya miongo mitatu tangu mara ya kwanza mwaka 1993 walipocheza dhidi ya Stella Abidjan ya Ivory Coast. Mchezo huo wa mwaka 1993 uliochezwa katika Uwanja wa Uhuru (zamani Taifa), Dar es Salaam, ulihudhuriwa na Mgeni Rasmi Hayati Mzee Ali Hassan Mwinyi, lakini Simba haikuweza kutwaa taji hilo.

Mapendekezo ya Mhariri:

1. Mamelodi Sundowns Yatoshana Nguvu na Pyramids FC Pretoria
2. Taifa Stars Kumenyana Kirafiki na Bafana Bafana Afrika Kusini
3. Yanga Yaagana na Stephane Aziz Ki, Aelekea Wydad AC Morocco
4. Al-Hilal Yampa Bruno Fernandes Wiki Kujibu Ofa Yao
5. Timu Zilizopanda Daraja Ligi Kuu Tanzania 2025/2026
6. Ambokile Aitega Mbeya City Baada Ya Kupanda Daraja
7. Napoli Yabeba Kombe la Serie A kwa Mara ya Nne Baada Vita Kali Dhidi ya Inter
8. Fiston Mayele Awaumiza Vichwa Mamelodi Kuelekea Fainali ya Ligi ya Mabingwa Afrika