Napoli Yabeba Kombe la Serie A kwa Mara ya Nne Baada Vita Kali Dhidi ya Inter

Napoli Yabeba Kombe la Serie A kwa Mara ya Nne Baada Vita Kali Dhidi ya Inter

Italia. Ushindi wa mabao 2-0 dhidi ya Cagliari umetosha kuipa Napoli ubingwa wa Ligi Kuu Italia, Serie A, kwa msimu wa 2024/25. Kwa matokeo haya, Napoli imefikisha pointi 81 baada ya mechi 38, ikiwa ni tofauti ya pointi moja dhidi ya wapinzani wao wa karibu, Inter Milan, waliomaliza na pointi 80.

Mabao ya ushindi ya Napoli yalifungwa na viungo wapya waliotua msimu huu: Scott McTominay aliyefunga bao lake la 12 msimu huu, pamoja na Romelu Lukaku aliyefunga bao la pili baada ya kuwatoka mabeki wawili wa Cagliari. Lukaku amemaliza msimu akiwa na mabao 14 na pasi 10 za mabao—rekodi bora zaidi ya pasi msimu huu.

Hii ni mara ya nne kwa Napoli kutwaa ubingwa wa Serie A, wakikumbuka mafanikio ya misimu ya 1986–1987, 1989–1990, na 2022–2023. Kwa mashabiki wa Napoli, ni ushindi wa kihistoria waliouadhimisha kwa shangwe kubwa ndani ya Uwanja wa Diego Armando Maradona na mitaa ya jiji la Naples.

Antonio Conte Ajiandikia Historia

Kocha Antonio Conte ametengeneza historia kwa kuwa mtu wa kwanza kutwaa taji la Serie A akiwa na vilabu vitatu tofauti – Juventus, Inter Milan, na sasa Napoli. Conte aliichukua Napoli mwezi Juni 2024 wakati timu hiyo ikiwa imeshuka kiwango na kumaliza nafasi ya 10 msimu uliopita baada ya kushindwa kutetea ubingwa wake wa 2022–2023.

Akizungumza baada ya ushindi, Conte alisema: “Taji hili ni gumu zaidi niliyowahi kushinda. Ni la kushangaza, na changamoto yake ilinipa msisimko mkubwa.” Aliongeza kuwa presha ya kuwavunjia mashabiki matumaini ilikuwa kubwa sana, akisisitiza umuhimu wa ushindi huo.

Conte alikosa kuongoza timu uwanjani baada ya kutimuliwa mechi iliyopita, lakini alishuka uwanjani mara baada ya filimbi ya mwisho kumalizika na kumkumbatia Lukaku, mchezaji aliyewahi kufanya naye kazi Inter Milan aliposhinda taji la 2020/21.

Mchango wa McTominay na Lukaku

Scott McTominay, kiungo aliyejiunga kutoka Manchester United, ameibuka kuwa nguzo muhimu ya mafanikio ya Napoli msimu huu. Mchezaji huyo raia wa Scotland ameisaidia timu kwa kufunga mabao 12 na kutoa pasi nne za mabao. Alimaliza msimu kwa kutunukiwa tuzo ya Mchezaji Bora wa Serie A (MVP), tuzo ya kihistoria kwa mchezaji wa taifa hilo katika ligi ya Italia.

Kwa upande wa Romelu Lukaku, aliyesajiliwa kutoka Chelsea mwezi Agosti 2024, amekuwa tegemeo kubwa katika safu ya ushambuliaji ya Napoli, licha ya kuondoka kwa nyota wa zamani Victor Osimhen (aliyejiunga na Galatasaray kwa mkopo) na Khvicha Kvaratskhelia (aliyejiunga na PSG mwezi Januari).

Safari ya Napoli Kurudi Kileleni

Baada ya kupoteza mechi ya ufunguzi dhidi ya Hellas Verona, Napoli ilijikakamua kwa kushinda mechi nane kati ya tisa zilizofuata. Pia walishinda mechi saba mfululizo kuanzia Desemba hadi Februari, mafanikio yaliyowasaidia kurudi kwenye ushindani wa taji.

Napoli haikufuzu michuano ya Ulaya msimu huu na walitolewa mapema katika Kombe la Italia (Coppa Italia), hali iliyowawezesha kuelekeza nguvu zao zote katika Serie A. Kwa upande mwingine, Inter walikuwa na ratiba ngumu baada ya kufika fainali ya UEFA Champions League na nusu fainali ya Coppa Italia.

Kwa mashabiki wa Napoli, ushindi huu ni ahueni baada ya miaka mingi ya matarajio. Mabango yaliyoandikwa “Tena” pamoja na namba “4” yalionekana uwanjani kama ishara ya kufurahia taji la nne la Serie A.

Mapendekezo ya Mhariri:

1. Fiston Mayele Awaumiza Vichwa Mamelodi Kuelekea Fainali ya Ligi ya Mabingwa Afrika
2. Viingilio Mechi ya Marudiano Simba Vs RS Berkane 25/05/2025
3. Muonekano wa Kombe Jipya La Klabu Bingwa CAF Champions League
4. Dk. Mwinyi Ailipa Simba Ada ya Uwanja Fainali Kombe la Shirikisho!
5. Kikosi cha RS Berkane Chatua Tanzania Kikiwa na Presha ya Simba Jumapili
6. Refa Aliyekataa Bao la Aziz Ki Apewa Mechi ya Simba Nyumbani CAF