Fiston Mayele Awaumiza Vichwa Mamelodi Kuelekea Fainali ya Ligi ya Mabingwa Afrika

Mayele Awaumiza Vichwa Mamelodi Kuelekea Fainali ya Ligi ya Mabingwa

Pretoria, Afrika Kusini — Mshambuliaji wa kimataifa kutoka Jamhuri ya Kidemokrasia ya Kongo (DR Congo), Fiston Kalala Mayele, anayekipiga katika Klabu ya Pyramids ya Misri, ameendelea kuwa changamoto kubwa kwa wapinzani wake huku fainali ya kwanza ya Ligi ya Mabingwa Afrika ikikaribia kwa kasi. Katika maandalizi ya mchezo huo muhimu unaotarajiwa kuchezwa Jumamosi, Mei 24, kwenye Uwanja wa Loftus Versfeld, mjini Pretoria, Afrika Kusini, kikosi cha Mamelodi Sundowns kimekiri kuwa Mayele ni hatari mkubwa anayepaswa kuchukuliwa kwa uzito.

Mlinzi wa Mamelodi Sundowns, Mosa Lebusa, amefichua kuwa japokuwa Mayele ni mshambuliaji mwenye uwezo mkubwa, mikakati ya kikosi chao hailengi kumdhibiti yeye pekee, bali inalenga kuizuia timu nzima ya Pyramids. Katika kauli yake kwa waandishi wa habari, Lebusa amesema:

“Mayele ni mchezaji mzuri sana, lakini sisi hatuangalii mchezaji mmoja tu, tunaiangalia timu yote kwa ujumla. Kwa upande wetu, tunataka tu kuwazuia Pyramids wasikaribie eneo letu la hatari na kuhakikisha tunapunguza nafasi zao za kufunga mabao. Tunajua kuwa karibu na eneo la hatari, Mayele ni hatari sana, na hilo ndilo jambo tunaloliangalia.”

Katika kampeni ya msimu huu ya Ligi ya Mabingwa Afrika, Mayele ameibuka kuwa mmoja wa wachezaji wa kuogopwa zaidi, akiwa amefunga mabao matano. Idadi hii inamuweka katika nafasi ya pili ya wafungaji bora wa mashindano, akiwa sawa na nyota wa Al Ahly, Emam Ashour, anayeshikilia nafasi ya kwanza.

Takwimu hizi zinaonesha wazi kuwa Mayele ni mchezaji mwenye ushawishi mkubwa katika mafanikio ya kikosi cha Pyramids, ambacho kwa ujumla wake kimefunga mabao 22 katika mashindano haya. Ushambuliaji wa Pyramids unaongozwa na Mayele umeifanya timu hiyo kuonekana kuwa tishio kwa wapinzani wao, hasa ikizingatiwa kuwa wapo chini ya uongozi wa kocha Krunoslav Jurčić, mzawa wa Croatia.

Matarajio Kuelekea Fainali na Hatua ya Marudiano

Baada ya mchezo wa kwanza kuchezwa mjini Pretoria, macho ya mashabiki yataelekezwa kwenye mchezo wa marudiano utakaofanyika tarehe Juni 1, mwaka huu, katika Uwanja wa 30 June uliopo nchini Misri. Itakuwa fursa ya mwisho kwa timu zote mbili kuonesha ubora wao na kutafuta taji la kifahari la soka barani Afrika.

Kwa upande wa Mamelodi Sundowns, changamoto ya kumzuia Mayele na wenzake haitakuwa rahisi. Safu ya ulinzi italazimika kuwa imara zaidi na kuhakikisha kuwa nafasi yoyote ya kufunga inayoweza kutokea kwa Mayele inapunguzwa mapema.

Mapendekezo ya Mhariri:

1. Viingilio Mechi ya Marudiano Simba Vs RS Berkane 25/05/2025
2. Muonekano wa Kombe Jipya La Klabu Bingwa CAF Champions League
3. Dk. Mwinyi Ailipa Simba Ada ya Uwanja Fainali Kombe la Shirikisho!
4. Kikosi cha RS Berkane Chatua Tanzania Kikiwa na Presha ya Simba Jumapili
5. Majina ya Waliochaguliwa Kidato cha Tano Geita 2025/2026
6. Kikosi Cha Simba VS RS Berkane Leo 17/05/2025 Fainali
7. Bologna Yaichapa AC Milan na Kubeba Taji la Copa Italia 2025 Baada ya Ukame wa Miaka 51
8. Refa Aliyekataa Bao la Aziz Ki Apewa Mechi ya Simba Nyumbani CAF