Uwanja wa Mkapa Kufungwa Kupisha Maandalizi ya AFCON 2027
Dimba la Benjamin Mkapa jijini Dar es Salaam linatarajiwa kufungwa rasmi kuanzia mwezi huu kupisha awamu ya mwisho ya ukarabati mkubwa, ikiwa ni sehemu ya maandalizi ya kuelekea michuano ya Kombe la Mataifa ya Afrika (AFCON) mwaka 2027.
Tangazo hilo limetolewa na Serikali, ikieleza kuwa hatua hiyo inalenga kukamilisha maboresho muhimu yatakayouwezesha uwanja huo kukidhi viwango vya kimataifa vinavyotakiwa kwa mashindano hayo ya bara.
Akizungumza katika mahojiano na gazeti la The Citizen, Msemaji Mkuu wa Serikali ambaye pia ni Katibu Mkuu wa Wizara ya Habari, Utamaduni, Sanaa na Michezo, Gerson Msigwa, amethibitisha kuwa ukarabati huo utachukua kati ya miezi sita hadi mwaka mmoja.
Amesema awamu hiyo ya mwisho itahusisha maboresho makubwa katika eneo la kuchezea (pitch) pamoja na miundombinu mingine ya uwanja.
“Huu ni ukarabati wa mwisho ambao utahusisha kazi kubwa kwenye nyasi na miundombinu inayozunguka uwanja. Pindi kazi itakapoanza, uwanja hautatumika kwa mechi yoyote,” amesema Msigwa.
Kwa mujibu wa Serikali, iwapo zipo mechi zitakazoweza kukamilika kabla ya kuanza rasmi kwa ukarabati, zitaendelea kama zilivyopangwa. Hata hivyo, mara kazi itakapoanza, timu zote zinazoutumia uwanja huo zitalazimika kutafuta viwanja mbadala.
Katika maboresho ya ratiba ya Ligi Kuu Bara msimu huu, mechi tatu zimepangwa kuchezwa kwenye dimba hilo: Azam dhidi ya Yanga (Machi 15, 2026), Azam dhidi ya Simba (Aprili 5, 2026) na Simba dhidi ya Yanga (Mei 1, 2026).
Hatua ya Uwanja wa Mkapa kufungwa kupisha maandalizi ya AFCON 2027 inatarajiwa kuwa na athari kwa ratiba ya soka la ndani, ikizingatiwa kuwa dimba hilo ni kitovu cha mechi kubwa za kitaifa na kimataifa nchini.
Serikali imesisitiza kuwa ukarabati huo ni sehemu ya maandalizi ya mwisho kuelekea AFCON 2027, huku lengo likiwa kuhakikisha uwanja huo unakuwa tayari kwa viwango vinavyohitajika kwa mashindano ya kimataifa.
Mapendekezo ya Mhariri:
