Mpanzu Aipa Simba Pointi Tatu dhidi ya Singida Black Stars Uwanja wa Airtel
Wekundu wa Msimbazi Simba SC leo wameibuka na ushindi wa mabao 2-1 dhidi ya Singida Black Stars katika mchezo wa Ligi Kuu Bara uliochezwa Jumatano Machi 11, 2026 kwenye Uwanja wa Airtel mkoani Singida, huku Elie Mpanzu akifunga bao la ushindi katika dakika za mwisho za mchezo.
Mpanzu aliihakikishia Simba pointi tatu muhimu baada ya kufunga bao la ushindi katika dakika ya 84 kufuatia pasi ya Clatous Chama, akivunja mtego wa kuotea na kumalizia nafasi hiyo kwa ustadi.
Bao hilo lilikuja wakati kocha wa Simba, Steve Barker, akiwa anatafuta mchezaji wa kuamua mchezo huo ambao hadi dakika ya 75 ulikuwa bado na matokeo ya sare.
Ushindi huo umeifanya Simba kufikisha pointi 27 baada ya kucheza mechi 12 na kuendelea kushika nafasi ya tatu kwenye msimamo wa Ligi Kuu Bara. Timu hiyo ipo nyuma ya JKT Tanzania yenye pointi 28 na Yanga yenye pointi 32, huku Azam ikiwa na pointi 24 kabla ya kucheza na Dodoma Jiji.
Mechi Ilivyokuwa
Simba ilianza mchezo kwa kasi na kupata bao la kuongoza mapema katika dakika ya saba kupitia Anicet Oura aliyemalizia mpira uliokuwa ukiondolewa na mabeki wa Singida Black Stars.
Baada ya dakika kadhaa za Simba kuonekana kuwa bora, Singida Black Stars ilisawazisha katika dakika ya 38 kupitia Ndumumwe Mossi aliyefunga kwa kichwa kufuatia krosi ya Lamine Jarjou.
Kipindi cha pili kilianza kwa Simba kufanya mabadiliko ambapo Alasane Kante alitolewa na nafasi yake kuchukuliwa na Baraka Mwangosi. Mabadiliko hayo yalimfanya Inno Loemba kusogea katikati ya uwanja kucheza pamoja na Yusuph Kagoma huku Mwangosi akisimama kama mshambuliaji wa mwisho.
Katika dakika ya 69, Singida Black Stars ilifanya mabadiliko mawili kwa kuwatoa Khalid Aucho na Mossi huku Elvis Rupia na Linda Mtange wakiingia.
Simba nayo ilifanya mabadiliko kwa kumtoa Libasse Gueye na kumwingiza Morice Abraham.
Dakika ya 77 Simba ilipata nafasi ya wazi kupitia Baraka Mwangosi, lakini kichwa chake kilizuiwa na kipa wa Singida Black Stars, Metacha Mnata, kufuatia krosi ya Shomari Kapombe.
Baadaye Simba ilimwingiza Elie Mpanzu kuchukua nafasi ya Inno Loemba, hatua iliyokuja kuleta matokeo baada ya kiungo huyo kufunga bao la ushindi katika dakika ya 84.
Kipigo Kingine kwa Singida Black Stars
Matokeo hayo yanaifanya Singida Black Stars kupata kipigo cha pili mfululizo nyumbani katika Ligi Kuu Bara baada ya awali kufungwa mabao 3-0 na Yanga kabla ya kupoteza tena kwa mabao 2-1 dhidi ya Simba.
Mapednekezo ya Mhariri:
- Ratiba ya 16 Bora Kombe la Shirikisho CRDB Federation Cup
- Mastaa Ligi Kuu Wavunja Rekodi Kombe la Shirikisho la CRDB Federation Cup
- Othmen Najjar Azungumzia Maandalizi ya Singida BS Kabla ya Kuivaa Yanga
- Azam vs Yanga Yaamishiwa Dimba la Chamazi
- Uwanja wa Mkapa Kufungwa Kupisha Maandalizi ya AFCON 2027
