Al-Hilal Yampa Bruno Fernandes Wiki Kujibu Ofa Yao

Al-Hilal Yampa Bruno Fernandes Wiki Kujibu Ofa Yao

Nahodha wa Manchester United, Bruno Fernandes, atapewa muda hadi wiki ijayo kuamua kama anataka kuondoka katika klabu hiyo, huku Al-Hilal ya Saudi Arabia wakipanga kutoa takriban pauni milioni 100 kwa mchezaji huyo wa kimataifa wa Ureno mwenye umri wa miaka 30. Endapo uhamisho huo utakamilika, Bruno anatarajiwa kulipwa takriban pauni milioni 65 kwa msimu, ikiwa ni sehemu ya mkataba mnono wa miaka mitatu. Klabu ya Bayern Munich pia imeripotiwa kuwa na nia, japokuwa ada kubwa ya uhamisho inayotakiwa na United inaweza kuwa kizuizi kikubwa.

Ofa Kubwa Kutoka Al-Hilal

Kwa mujibu wa gazeti la Daily Mail, klabu ya Al-Hilal kutoka Ligi Kuu ya Saudi Arabia imekuwa na matumaini makubwa ya kumshawishi Bruno Fernandes kujiunga nao. Klabu hiyo tayari imewasilisha pendekezo la mkataba wa miaka mitatu, likijumuisha mshahara wa wiki ya pauni 700,000. Hii ikiwa pamoja na bonasi za usajili na malipo ya mafanikio, kiasi hicho kinaweza kufikia pauni milioni 65 kwa msimu.

Kwa upande mwingine, ili kuharakisha dili hilo, Al-Hilal wako tayari kulipa Manchester United kiasi cha pauni milioni 100 kama ada ya uhamisho. Lengo kuu la klabu hiyo ni kuhakikisha wanampata mchezaji mkubwa kabla ya kuanza kwa mashindano ya Kombe la Dunia la Klabu mwezi ujao.

Al-Hilal Wampa Fernandes Ultimatum ya Saa 72

Kwa mujibu wa taarifa hizo, Al-Hilal wanatarajia kuwasilisha ofa yao ya mwisho katika siku chache zijazo. Baada ya hapo, Bruno Fernandes atapewa muda wa saa 72 pekee kufanya maamuzi. Endapo atakataa kujiunga nao, Al-Hilal wameweka wazi kuwa wataelekeza macho yao kwa wachezaji wengine.

Hatima ya Bruno Fernandes Katika Mizani

Baada ya Manchester United kupoteza mechi dhidi ya Tottenham Hotspur, Fernandes alizungumza kwa uwazi kuhusu mustakabali wake. Akiwa mkweli, alikiri kwamba anaelewa uwezekano wa kuuzwa kwa nia ya kuiwezesha klabu kupata fedha, akisema:

“Kama klabu itaona ni wakati wa kutengana kwa sababu wanataka kupata fedha, basi iwe hivyo.”

Ingawa bado anasemekana kuwa na furaha ndani ya Manchester United, Bruno anaelezwa kuwa anachukua muda kutafakari kwa kina juu ya mustakabali wake. Kukosa kwa United kushiriki michuano ya Ulaya msimu ujao kutasababisha kupunguzwa kwa mishahara kwa asilimia 25 kwa wachezaji wote. Tofauti hiyo kubwa ya kifedha kati ya United na Al-Hilal inaweza kuwa sababu kubwa inayomvutia Fernandes kuangalia upya uamuzi wake.

Zaidi ya hayo, hali ya sintofahamu kuhusu mwelekeo wa klabu hiyo chini ya meneja Ruben Amorim inaweza kumfanya Bruno asiwe na imani ya kutosha kuendelea kubaki, hasa katika kipindi hiki muhimu cha mwisho wa taaluma yake.

Mapendekezo ya Mhariri:

1. Timu Zilizopanda Daraja Ligi Kuu Tanzania 2025/2026
2. Ambokile Aitega Mbeya City Baada Ya Kupanda Daraja
3. Napoli Yabeba Kombe la Serie A kwa Mara ya Nne Baada Vita Kali Dhidi ya Inter
4. Fiston Mayele Awaumiza Vichwa Mamelodi Kuelekea Fainali ya Ligi ya Mabingwa Afrika
5. Viingilio Mechi ya Marudiano Simba Vs RS Berkane 25/05/2025
6. Muonekano wa Kombe Jipya La Klabu Bingwa CAF Champions League
7. Dk. Mwinyi Ailipa Simba Ada ya Uwanja Fainali Kombe la Shirikisho!
8. Kikosi cha RS Berkane Chatua Tanzania Kikiwa na Presha ya Simba Jumapili